Ամփոփագիր

    Վարչական իրավունքի սկզբունքներն առանձնահատուկ նշանակություն ունեն վարչական իրավունքի զարգացման գործում, մասնավորապես, դրանք համակարգաստեղծ դեր են կատարում՝ նպաստելով նոր ինստիտուտների ձևավորմանը։ Վարչական իրավունքի սկզբունքների գոյությունը վարչական մարմնին հնարավորություն է տալիս իրականացնելու արդար վարչարարություն, նույնիսկ եթե որևէ հստակ իրավական նորմ առկա չէ, որը կարգավորում է վիճահարույց իրավիճակը։

    Հոդվածում քննարկվում է հայեցողական լիազորությունների սահմանափակման սկզբունքի և վարչական իրավունքի այլ սկզբունքների միջև առկա հարաբերակցությունը՝ վերլուծելով դրանցից յուրաքանչյուրի խախտման հնարավոր հավանականությունը հայեցողական լիազորությունների ոչ իրավաչափ կիրառման պարագայում: Միաժամանակ անդրադարձ է կատարվել վարչական մարմնի կողմից վարչարարության սկզբունքի պահպանմանը, որը, ժամանակակից իրավական զարգացումներին համահունչ, ենթադրում է նաև մարդու հիմնարար իրավունքների և օրինական շահերի ապահովում, ինչպես նաև օրինականության և հայեցողական լիազորությունների սահմանափակման սկզբունքների փոխգործակցությանը նպաստող երաշխիքներ։

        Հոդվածում առանձնացվել են վարչարար գործունեության որակական հատկանիշները՝ կապելով դրանք վարչարար գործունեության ընթացքում վարչական հայեցողության կիրառմամբ ծագած արտաքին և ներքին արգելքների հաղթահարման հետ։ Քննարկվել են նաև վարչարար գործունեության որակական հատկանիշները՝ որպես վարչական հայեցողության կիրառման կարևոր պայման, որոնք տեսական և գործնական նշանակություն ունեն վարչարարության սկզբունքների փոխգործակցության ապահովման հարցում։

    Հիմնաբառեր. վարչական իրավունք, սկզբունքներ, վարչական հայեցողություն, լիազորություն։