Ամփոփագիր

Ներկայացված մեղադրանքի բնույթի և հիմքի մասին տեղեկացվելու իրավունքը մեղադրյալի առանցքային իրավունքներից է։ Առանց այդ իրավունքի մեղադրյալի այլ իրավունքների իրականացումը կա՛մ անիրական է, կա՛մ խիստ անարդյունավետ (օրինակ՝ մեղադրյալը ցուցմունք տալու իր իրավունքից արդյունավետորեն կարող է օգտվել, երբ հանգամանորեն տեղեկացված է, թե ինչից պետք է պաշտպանվի, ինչ փաստական հանգամանքներ են իրեն վերագրվում, երբ է նա կատարել իրեն վերագրվող այդ արարքը և այլն, իսկ առանց հստակ իմանալու մեղադրյալի կողմից ցուցմունք տալով իր պաշտպանության իրավունքի իրացումը դառնում է պատրանքային։ Նույն կերպ, մեղադրյալի՝ վարույթին նյութեր և ապացույցներ կցելու իրավունքը կարող է արդյունավետորեն իրացվել միայն այն դեպքում, երբ վերջինս հստակ իմանա՝ ինչի համար է մեղադրվում, այսինքն՝ մեղադրանքի հիմքի և բնույթի մասին և այլն)։ Այսպիսի օրինակները շատ են, հենց այդ պատճառով մեղադրյալի քննարկվող իրավունքը կարելի է իրապես կոչել նրա իրավունքների թագուհի։ Այս գիտագործնական մեկնաբանությունն ուղղված է հենց մեղադրյալի նշված իրավունքի մեկնաբանությանը, այդ իրավունքի էության բացահայտմանը, որը թույլ է տալիս նաև զանազանել մեղադրյալի քննարկվող իրավունքը մեկ այլ իրավունքից՝ գործի նյութերին ծանոթանալու մեղադրյալի իրավունքից։

Հիմնաբառեր. մեղադրյալ, մեղադրանքի բնույթ, մեղադրանքի հիմք, ապացույցներ: