Ս.թ. օգոստոսի 27-ին Ղազախստանի Հանրապետության սահմանադրական խորհրդի նախագահությամբ տեսահանդիպման ձևաչափով տեղի ունեցավ Սահմանադրական դատարանների և իրավազոր մարմինների ասիական ընկերակցության 4-րդ կոնգրեսը, որի աշխատանքներին մասնակցեց նաև ՀՀ Սահմանադրական դատարանի նախագահի լիազորությունները ժամանակավորապես կատարող Աշոտ Խաչատրյանը: «21-րդ դարի սահմանադրություն. իրավունքի գերակայություն, մարդու որպես բարձրագույն արժեք և պետության արդյունավետությունը» խորագիրը կրող Կոնգրեսի աշխատանքներին մասնակցում էին ասիական և եվրոպական տարածաշրջանի 30-ից ավել երկրների սահմանադրական արդարադատություն իրականացնող մարմինների պատվիրակություններ:
Օրակարգային հարցերի վերաբերյալ իրենց ելույթներում Կոնգրեսի մասնակիցները կարևորեցին COVID-19 համավարակի ընթացքում սահմանադրական դատարանների դերակատարումը մարդու իրավունքների պաշտպանության ու խթանման, իրավունքի գերակայության և ժողովրդավարական կառավարման ոլորտներում: Շնորհավորելով Ղազախստանի Հանրապետության սահմանադրական խորհրդի գործընկերներին այդ երկրի Սահմանադրության ընդունման 25-ամյակի կապակցությամբ՝ Ա. Խաչատրյանն իր զեկույցում մասնավորապես անդրադարձավ մարդու իրավունքների սահմանադրական դոկտրինի վրա համավարակային ճգնաժամի ներգործության հիմնախնդիրներին:
Կոնգրեսի մասնակիցներին հատուկ ողջույնի տեսաուղերձով դիմեց նաև Ղազախստանի Հանրապետության նախագահ Կասիմ-Ժոմարտ Տոկաևը: