Հուլիսի 4-ին Սահմանադրական դատարանում բացվեց գեղանկարիչ Ռուդիկ Պետրոսյանի կտավների ցուցահանդեսը: Այն նվիրված էր ՀՀ Սահմանադրության օրվան:
Սահմանադրական դատարանի նախագահ, ցուցահանդեսի կազմակերպման նախաձեռնող Գ. Հարությունյանը «Սահմանադրություն եւ մշակույթ» բնորոշ վերտառությունը տվեց այս միջոցառմանը, որի գաղափարը ծնվել էր պետական գործչի եւ գեղանկարչի մտերմության արդյունքում, եվ առիթն էլ Ստրասբուրգում Գ. Հարությունյանի «Սահմանադրական մշակույթ. պատմության դասերը եւ ժամանակի մարտահրավերները» մենագրության անգլերեն լեզվով հրատարակության գրքի շնորհանդեսն էր, որին մասնակցող Եվրոպայի խորհրդի գլխավոր քարտուղար Թ․ Յագլանդը հետեւյալ ձեւակերպումն արեց. «Սահմանադրական մշակույթը հայկական բրենդ է դառնում»:
Եվ ահա Ռուդիկ Պետրոսյանը կերտեց «ՍԱՀՄԱՆԱԴՐՈՒԹՅԱՆ ԾՆՈՒՆԴԸ» եռանկարը, որն այսօրվա ցուցահանդեսում առանձնակի տեղ էր զբաղեցնում:
Եռանկարի աջ կողմում Գրիգոր Լուսավորիչն է եւ Տրդատ թագավորը: Նրանք ապագային սեւեռված հայացքով խորհրդանշում են Հայաստանում քրիստոնեության` որպես պետական կրոն ընդունելու խորհուրդը եւ հայ ժողովրդի արժեհամակարգային կողմնորոշումը: Կենտրոնում 365 թվականի Աշտիշատի ժողովի վերացարկված ընկալմամբ պատկերումն է, որտեղ բացառիկ վարպետությամբ ներկայացված են. ա/ժողովուրդը` ինքնաճանաչման եւ սահմանադրորեն ապրելու հաստատակամությամբ, բ/արդարադատության խորհրդանիշի ներդաշնակությունը հանրային տրամադրությանը, գ/ստեղծված հանրային մթնոլորտում իմաստունների ձեռամբ Սահմանադրության արարումը: Այս բոլորն ամփոփում են «սահմանադրություն» հասկացության վերաբերյալ 1837 թվականին Վենետիկում հրատարակված` Նոր բառգիրք հայկազյան լեզվի եզակի բնորոշումը. «Որոշումն սահմանաց եւ Տեսչութիւն վերին»: Ձախ կողմում Պատմահայր Մովսես Խորենացին է, ով բացառիկ գնահատական է տվել Աշտիշատի ժողովի ընդունած Կանոնական սահմանադրությանը` «կանոնական սահմանադրութեամբ հաստատեաց զողորմածութիւն», ինչը մագաղաթի վրա ներկայացնում են հրեշտակները:
Ցուցահանդեսում Ռուդիկ Պետրոսյանի մոտ երեսուն կտավների շարքում ներկայացված էին նաեւ նրա դստեր՝ նկարչուհի Մերի Պետրոսյանի կտավներից:
Արարողության մասնակիցներին ներկայացվեց նաեւ ՀՀ սահմանադրական դատարանի նախագահ Գ. Հարությունյանի եւ Երեւանի պետական համալսարանի պրոֆեսորներ Հ. Սարգսյանի, Ռ. Գեւորգյանի հեղինակած «Սահմանադրականություն. ախտորոշման, մշտադիտարկման եւ կառավարման խնդիրներ» նոր լույս տեսած գիրքը: