Ս.թ. օգոստոսի 26-ին ՀՀ Սահմանադրական դատարանի նախագահի լիազորությունները ժամանակավորապես կատարող Աշոտ Խաչատրյանը մասնակցեց Սահմանադրական վերահսկողության մարմինների եվրասիական ընկերակցության գործադիր մարմնի հեռավար լիագումար նիստին: Տեսահանդիպմանը մասնակցեցին Ընկերակցության բոլոր 9 անդամ պետությունների սահմանադրական վերահսկողություն իրականացնող մարմինների պատասխանատու ներկայացուցիչները:
Իր խոսքում ողջունելով Ընկերակցությունում Ղազախստանի Հանրապետության սահմանադրական խորհրդի նախագահությունը՝ Աշոտ Խաչատրյանը ընդգծեց, որ ՀՀ Սահմանադրական դատարանը պատրաստակամ է շարունակաբար ընդլայնել իր ներգրավվածությունը կազմակերպության ընթացիկ աշխատանքներում, ինչպես նաև կարևորեց Ընկերակցության դերակատարումը տարածաշրջանային գործընկերության ամրապնդման գործում:
Տեսաժողովի ընթացքում մասնակիցները հանգամանորեն մտքեր փոխանակեցին Ընկերակցության ընթացիկ ծրագրերի և երկարաժամկետ նպատակների իրականացման շուրջ: Ընկերակցության քարտուղարության առաջարկությամբ որոշում կայացվեց ձևավորել միասնական աշխատանքային խումբ, որը մոտակա ամիսների ընթացքում մշակելու է Ընկերակցության կանոնադրության նախագիծը և ներկայացնելու է այն հաջորդ լիագումար նիստի մասնակիցների հաստատմանը: Կողմերը նաև անդրադարձան Սահմանադրական արդարադատության համաշխարհային խորհրդաժողովի 5-րդ կոնգրեսի վերաբերյալ ծավալված վերջին զարգացումներին: