Ս.թ. փետրվարի 19-ից 20-ը սահմանադրական դատարանի դատավոր Արաիկ Թունյանը մասնակցեց Մոլդովայի Հանրապետության սահմանադրական դատարանի հիմնադրման 25-ամյակի կապակցությամբ կազմակերպված «Սահմանադրական արդարադատություն և հանրության արձագանքը. երբ Սահմանադրական դատարանների որոշումները չեն համընկնում հասարակության մեծամասնության կարծիքին» խորագրով միջազգային խորհրդաժողովի աշխատանքներին:
Խորհրդաժողովի աշխատանքներին մասնակցում էին Մոլդովայի Հանրապետության քաղաքական և դատաիրավական ոլորտների բարձրաստիճան ներկայացուցիչներ, ինչպես նաև Ռուսաստանի, Ուկրաինայի, Բելառուսի, Ղազախստանի, Բալթյան և Արևելյան Եվրոպայի 14 երկրների գործընկեր դատարանների ներկայացուցիչներ ու մասնակիցներ ակադեմիական-համալսարանական ոլորտից: Խորհրդաժողովի ընթացքում ողջույնի խոսքով հանդես եկան Մոլդովայի Հանրապետության նախագահ Իգոր Դոդոնը, սահմանադրական դատարանի նախագահ Վլադիմիր Ցուրկանը, ինչպես նաև Վենետիկի Հանձնաժողովի նախագահ Ջիանի Բուքիքիոն:
Խորհրդաժողովի շրջանակներում Մոլդովայի սահմանադրական դատարանի նորընտիր նախագահ պարոն Վլադիմիր Ցուրկանը նախաձեռնել էր նաև քաղաքավարության հանդիպումներ օտարերկրյա պատվիրակությունների ղեկավարների հետ: Դատավոր Արաիկ Թունյանի և պարոն Ցուրկանի միջև տեղի ունեցած առանձնազրույցի ընթացքում քննարկվեցին Հայաստանի և Մոլդովայի սահմանադրական դատարանների միջև հետագա համագործակցության հարցեր, ինչպես նաև ՀՀ սահմանադրական դատարանի կողմից առաջիկայում կազմակերպվելիք միջազգային խորհրդաժողովին Մոլդովայի սահմանադրական դատարանի պատվիրակության մասնակցության հետ կապված մանրամասներ: